Nagpahayag si Vice President Sara Duterte nga naluoy gid siya sa mga staff sa Office of the Vice President (OVP) nga ginapatawag sa Kamara kag ginakwestyon sang mga mamalidha kaangot sa paggamit sang budget.
Kaangot ini sa pagbusisi sang House committee on good government and public accountability sa confidential funs nga gingamit sang OVP kag sang Department of Education (DepEd) nga ginpamunuan ni Sara tubtub sang Hulyo.
Amo ini ang ginsabat sang bise-presidente sang ginpamangkot kun ano ang pinakadaku nga pagpanghangkat nga iya ginaatubang subong bilang ikaduha sa pinakamataas nga opisyal sang pungsod.
“Ang akong mga kauban sa OVP kay kung makit-an ninyo, luoy gyud kaayo sila. Sa pag-persecute sa akoa, sa paggukod sa akoa, sa pagdaot sa akong pangalan, naapil ang ilang trabaho, naapil ang ilang pangalan,” pahayag sini.
(Ang mga kasama ko sa OVP, kung makikita niyo, kawawang-kawawa sila. Sa pag-persecute sa akin, sa paghahabol sa akin, sa paninira ng aking pangalan, nadamay ang kanilang trabaho pati ang kanilang pangalan)
Pahayag pa niya, indi man mga pulitiko ang OVP staff kag officials kag dapat nga indi na sila pagdalahigon sa mga indi paghangpanay sa pulitika.
Ginsulit man sini nga posible nga ang pagbuhin sang budget sang OVP ang mangin rason nga madulaan sang trabaho ang 200 ka mga personnel.
Pahayag pa sang bise-presidente, desisyon na sang Kamara kag Senado kun ano ang himuon sa iya budget, kag batunon niya kun pila man ang iya ihatag sa iya para sa iya mga programa kag proyekto.
Kahapon, sa ikaanum nga hearing sang House panel, gin-cite in contempt ang OVP Chief of Staff nga si Atty. Zuleika Lopez.
Nangakig ang mga kongresista bangud wala ini direkta nga nagasabat sa mga pamangkot lakip na sa mga pamangkot kaangot sa confidential funds sang OVP.
Si ACT Teachers Party-list Rep. France Castro nga nag-move nga dagdagan sang contempt order si Lopez matapos ang iya nga interpellation kaangot sa OVP letter nga ginpadala sa Commission on Audit. Si House panel chairperson Manila 3rd District Rep. Joel Chua ang nag-approve sang motion sang may yara sang nag-ugyon sa ginduso ni Castro.
I-detain si Lopez sa House detention facility tubtub sa November 25 nga amo ang resumption sang hearing.
