Nagpaguwa sang official statement si Vice President Sara Duterte nga nagapanginwala nga kinopyahan lamang ukon produkto sang plagiarism ang iya libro nga “Isang Kaibigan.”
Ini matapos nabasa sang publiko ang kaundan sang children’s book kag madamo ang nagpahayag nga pareho ini sa graphic novel sang American author kag artist nga si Andy Runton nga may tig-ulo “Owly Just a Little Blue”.
Pareho ang libro nanday Sara kag Runton nga naga-feature sa owl bilang main character kag nagabilin man sang leksyon kaangot sa balor sang pag-abyanay kag kaayo.
Sa statement sang bise-presidente nga gin-isyu kagab-i, nakasaad nga mahapos lamang magsulat sang short story sandig sa kaugalingon nga eksperyensya kag indi na kinahanglan magpangopya pa.
Dugang sini, ang proyekto ang nagatuyo nga ma-engganyo ang mga bata nga palanggaon ang pagbasa kag magsulat sang ila kaugalingon nga istorya. Indi ang libro ang problema suno sa iya kundi ang mahina nga abilidad sang mga bata sa pagbasa.
Gintapos sini ang iya statement paagi sa isa ka teaser nga bantayan ang iya masunod nga libro nga kaangot naman sa pag-traidor sang isa ka abyan.
“Abangan Ninyo ang susunod kong isusulat na libro tungkol sa pagtataksil ng isang kaibigan. Shukran,” kabahin sang statement.
Antes ang statement mismo ni Sara, una na nga nagpaathag si Office of the Vice President (OVP) spokesperson Michael Poa nga may copyright registration kag na-rehistro ang libro ni Sara sang December 2023.
Ang libro ni Sara ang nahanungod sa istorya sang owl nga nadulaan sang iya abyan nga mga pispis sang naguba ang iya pugad bangud sa bagyo. Sa tunga sang iya kasubo, isa ka mainabyanon nga parrot ang nagtanyag saang bulig agud magpatukod sang iya pugad.
Ginlunsar ang libro sang Nobyembre 2023 kag gina-distribute sa pila ka public schools sang libre.
Matandaan nga ang libro nag-agaw sang atensyon sang netizens matapos nga ini ang nangin sentro sang mainit nga sabtanay nanday Duterte kag Senator Risa Hontiveros sa ginaalegar sang bise presidentE nga ginapolitika ang ginaduso nga P2.037-billion budget sang iya opisina para sa 2025.
