Gin-akusaran ni Vice President Sara Duterte ang administrasyon ni Presidente Ferdinand Marcos Jr. nga ginagamit ang mga alegasyon kaangot sa pondo halin sa China, shabu sa Laos, kag ginapatihan nga travel authority agud maghimo sang naratibo nga nagatum-ok sa iya.
Sa iya nga statement nga ginpagwa Oktubre 20, una nga ginhikayan ni Duterte ang House prosecution team nga napaslawan suno sa iya nga maka-establisar sang mabakod nga kaso nga makabig nga impeachable offense.
Dugang pa niya, makita subong ang pagbag-o sang naratibo sang gobyerno sa pag-atake sa iya.
“Now, we are witnessing an apparent shift in the government’s narrative in taking me down, attempting to reframe the matter as a national security issue. Every thread seems to be stretched into a conspiracy—from a business venture allegedly linked to Chinese funding to a drug bust in Laos supposedly connected to a Mindanao-Davao conspiracy,” suno kay Duterte.
“But what evidence does the government have to substantiate these sweeping accusations? None that has been convincingly presented,” dugang niya.
Ginlaragway man ni Duterte nga tanda sang desperasyon sang gobyerno ang nagalapta nga travel authority para sa iya ginapatihan nga pagbisita sa Laos.
Suno sa iya, peke ang dokumento kag ginhimo lamang agud suportahan ang naratibo nga wala sang masaligan nga ebidensya.
“What we see instead is desperation, exemplified by a purported travel authority for Laos that appears to have been fabricated to prop up a narrative unsupported by credible evidence,” pahayag sang vice president.
Gindugang pa ni Duterte nga dapat mag-obra na ang gobyerno para sa katawhan kag untatan ang pamulitika, bangud suno sa iya, madamo ang imol, ginagutom kag akig.
Ang ginapatihan nga travel authority amo ang dokumento nga nagalapta kaangot sa iya ginalegar nga pagbisita sa Laos halin Septyembre 29 tubtob 30.
Ang dokumento, nga gin-post sang anay columnist nga si Ramon Tulfo, nagapakita nga gin-aprubahan sang Office of the President (OP) ang biyahe ni Duterte isa ka adlaw antes sang iya nga paghalin.
Sa iya post, gin-angot ni Tulfo ang ginapatihan nga pagbiyahe ni Duterte sa napaslawan nga shipment sang 521 ka kilo sang shabu halin sa Laos pakadto sa Pilipinas sang Oktubre 1.
Apang, ginpahayag sang Office of the Executive Secretary nga wala sang amo sini nga travel request nga ginpangabay ukon gin-aprobahan.
Una naman ginklaro ni Sec. Jonvic Remulla nga wala sang ebidensya nga naka-link sa mga Duterte sa amo nga droga.
Ang ginmensyonar naman ni Duterte nga Chinese funding amo ang nagguwa sa impeachment court sandig mismo sa records sang AMLC nga may pondo halin sa China nga nagkadto sa Cale88 nga gina-link naman sa bana ni Duterte. #
