Nagpamalibad si Vice President Sara Duterte nga magkomento kaangot sa gin-anunsyo sang Kamara nga P1-million nga padya para sa makahatag sang impormasyon kaangot sa certain “Mary Grace Piattos.”
Ini nga pangalan amo ang may pirma nga nagtuhaw sa kalabanan nga acknowledgement receipts para sa confidential funds sang mga opisina sa idalom ni Sara Duterte.
Sabat sang bise-presidente, ang mga dokumento kaangot sa confidential expenses sa iya mga opisina ang direkta nga ginpasa sang special disbursing officer (SDO) sa Commission on Audit (COA) kag wala na ini nag-agi sa iya.
Ini ang rason suno sa iya nga wala na niya nakit-an ang acknowledgement receipt nga ginahambal sang lower house.
“I have no comment on that, ‘no, because I have not seen the acknowledgement receipt na kanilang sinasabi. Because basically, lahat ng mga documents, hindi siya dumadaan sa akin. Dumidiretso siya sa SDO and sina-submit siya sa…office ng COA na gumagawa ng audit ng confidential funds,” paathag ni Sara.
“So hindi ako maka-comment lalong-lalo na hindi namin alam paano pinroseso ang pagbigay ng copies ng ARs (acknowledgement receipts) or ng submissions namin sa COA to the House of Representatives, and sino ang nagha-handle noong mga documents,” dugang sini.
Una na nga ginkumpirma sang COA sa atubang sang House committee on good government and public accountability nga ang OVP kag DepEd ang nagpasa sang mga dokumento nga may sala nga mga petsa, mga pirma nga wala sang pangalan sang signatories, kag indi mabasahan nga pangalan sang signatories para ma-justify ang disbursement sang confidential funds sang 2022 and 2023.
Ginsiling man anay ni COA auditor Gloria Camora nga madamo sa acknowledgment receipts ang napetsahan sang December 2023 apang wala sila sang data sa exact number.
May yara man sang mga acknowledgment receipts ang mga opisina ni Duterte nga wala sang petsa.
Sa ginbuyagyag sang COA, 787 acknowledgement receipts ang may signatories nga wala napangalanan kag 302 ARs nga indi man mabasahan ang pangalan sang signatories sang ginpasa sang mga opisina ni Sara ang mga dokumento sang 2023.#
