Wala nagtambong si Vice President Sara Duterte sa hearing sang Senado kaangot sa proposed budget sang iya opisina para sa 2027 apisar nga may pahuway sa iya impeachment trial subong.
Sa baylo nga magpakita sa upper chamber, nagtambong si Duterte sa inurnment rites ukon seremonya sang paglubong sang iya long-time city planner sa Davao.
Bisan wala ang Bise Presidente, gin-aprubahan sang Senate finance committee para sa plenary debate ang proposed budget nga P785-million sang Office of the Vice President (OVP) pagkatapos sang 16 minutos nga hearing.
Mas manubo ini sang 11 porsyento kun ikumparar sa P889-million nga aprubado nga budget sang opisina para sa 2026.
Nagrepresentar sa Bise Presidente sanday OVP Chief of Staff Zuleika Lopez kag Assistant Chief of Staff Lemuel Ortonio.
Sang ginpamangkot ni Senate President Sherwin Gatchalian kun ngaa wala nagtambong si Duterte, ginpahayag ni Lopez nga nagarepresentar ang Bise Presidente sa iya amay nga si anay Presidente Rodrigo Duterte sa inurnment rites.
Ginalauman kuntani ni Gatchalian nga makatambong ang Bise Presidente sa plenary debate agud marepresentar ang iya opisina kag mapresentar ang rason sa likod sang ila proposed budget.
Samtang, ginpamangkot ni Senate Finance Committee Chairman JV Ejercito kun nagahingyo bala ang OVP sang dugang nga pondo para sa ila libre nga pagsakay sa bus kag mga livelihood program.
Suno kay Lopez, i-recalibrate na lamang sang opisina ang ila mga programa sa baylo nga maghingyo sang dugang nga pondo, bisan pa nga mahimo magnubo ang kadamuon sang mga benepisyaryo.
Sanday Senador Imee Marcos kag Senador Bong Go, nga mga kaalyado ni Duterte, ang nagmosyon para sa pag-apruba sang komite sa proposed budget, bilang pagrespeto sa parliamentary courtesy.
