Gina-imbestigaran na subong sang Department of Justice (DOJ) si Vice President Sara Duterte sa posible nga violations sini sa Republic Act No. 11479 ukon sa Anti-Terrorism Law bangud sa iya pahayag batok kay President Ferdinand Marcos Jr. nga naangot sa plano nga asasinasyon.
Ginkumpirma ini ni Justice Undersecretary Jesse Andres kahapon nga adlaw, Nobyembre 27.
Ginpaathag sini nga nagpadala sila sang subpoena kay Sara bangud gusto sang National Bureau of Investigation (NBI) nga hatagan siya sang ligwa kag tyansa nga makapaathag kaangot sa iya nga ginpahayag.
Suno kay Andres, sa section 4 sang Anti-Terror Law, nakasaad ang nga ang akto sang terorismo ang nagalakip kun ang isa ka tawo nag-engage sa aktwasyon nga nagatuyo nga magpatay ukon magtuga sang seryoso nga injury sa isa ka tawo, ukon nagabutang sang kabuhi sang isa ka tawo sa katalagman.
Mas may bug-at pa gid ini suno sa opisyal bangud nakasentro sa presidente ang pahayag nga ginbuy-an ni Sara.
“Section 4 [describes] the acts of terrorism and one of the acts defined there as punishable in Section 4 of the Terrorism Law is when one engages in acts intended to cause death or serious bodily injury to any person. Or endangers a persons life,” suno kay Andres.
“Nakasaad at klaro sa ating batas na kapag kayo ay gumawa ng mga hakbang para saktan at bigyan ng banta ang buhay ng ibang tao, kasama po ‘yan sa terrorism,” dugang sini.
“Lalo na po kung ang purpose n’yan ay to intimidate and create an atmosphere or sow fear. Tandaan n’yo po na ang banta sa Pangulo ay isang national security matter,” kabahin pa sang paathag.
Wala na ginpaligad ni Sara ang adlaw kag nagsabat ini sa pahayag nga posible may violation siya sa anti-terror law.
Sa iya press conference, ginsiling sini nga imbestigaran lang siya agud nga ma-access sang NBI ang iya assets kag properties.
Paathag sini, nakahangop siya ng kun ang tawo nagapangatubang sang kaso nga paglapas sa anti-terorrism law, igakansela ang passport sini kag ibutang sa Interpol red notice kag mangatubang pa sa Anti-Money Laundering violation charges.
Buot silingon sini suno sa iya, iga-freeze ang iya kuwarta kag propiedad.
Dugang sini, posible nga may ipaguwa nga search warrant agud nga makasulod sa mga propiedad sang akusado kag didto tamnan sang armas kag illegal drugs para nga mahimo nga ebidensya batok sa akusado.
Gintawag ini sang bise-presidente nga “oppression and harassment” bangud lang sa iya pahayag nga suno sa iya wala nahangpan sang maayo ukon “taken out of context.”
“Natatawa ako sa violations on the anti-terror law kasi sinusubukan nila to reach sa aking properties and assets… Ifre-freeze nila yung pera at properties mo. Hindi ka makakagasto ng pera at hindi ka makakapasok sa properties mo,” kabahin sang pahayag sini sa iya latest press conference.
Ginlaragway pa ini sang bise nga kaangay sa natabo kay Negros Oriental congressman Arnolfo “Arnie” Teves Jr.n sang gin-tag man sang Anti-Terrorism Council sang 2023 bilang terorista bangud sa alleged killings kag harassment sa Negros Oriental.#
