ILOILO CITY–Ginpanginwala ni Sara Mayor Ermelita Salcedo nga naga-organisa sang goons ang ila pamilya sa Sara, Iloilo.
Sa exclusive interview sang Bombo Radyo kay Mayor Salcedo, iya ginpahayag nga wala sang goons ang ila pamilya.
Sa pagkamatuod suno kay Mayor Salcedo, wala siya sang dala nga armas ukon upod nga police escort sa tion nga maglibot sa ila banwa.
May kaangtanan naman sa text brigade tuhoy sa ginapahayag pagpamomba sang Muslim community sa nasambit nga banwa, ginpahayag sang alkalde nga wala snag kamatuoran ang tuhoy diri.
Ginpasalig man sang Muslim community suno sa alkalde nga indi sila magpatigayon sang kalakasan.
Nagahibubun-ot man ang alkalde bangud nga ang iya pamilya ang ginatudlo nga utok sa ginaplano nga pagpamomba kasunod sang ginpatigayon nga raid sa ila balay.
Makapamatuod sang ila pagka inosente suno sa alkalde amo ang mga pumuluyo nga lubos nga nakakilala sa ila pamilya.
Ginpahayag man ni Mayor Salcedo nga siya pa mismo ang naga-engganyo sa mga pumuluyo  nga isungka sa pulis ang indi lisensyado nga armas.
Sa pihak sang natabo sa ila pamilya, ginatuigyan na lang ni Mayor Salcedo sa Ginuo kag sa pumuluyo ang paghusgar sa ila.