Ginsuyaan ni Vice President Sara Duterte ang gina-alegar nga “Save the Queen” operation nga iya sang “Davao mafia” nga ginabati-bati nagatuyo nga himuon siya nga masunod nga presidente sang Pilipinas.
Nag-ugat ini sa statement ni former Bureau of Customs (BOC) intelligence officer Jimmy Guban sang nag-atubang siya sa quad committee sa Kamara sang nagligad nga semana.
May ginmensyonar si Guban nga biktima siya sang “Davao Mafia” nga ang mayor nga tuyo amo pag-“save” sang “queen.”
Wala ginhingadlan si Sara apang siya ang nagaisahanon nga babaye halin sa pamilya Duterte nga yara sa national politics.
Matunog man ang bati-bati nga magapadalagan ini sa pagka-presidente sa 2028.
Sabat naman ni Sara, wala sang tawo nga magahimo sang operation kag ihambal man mismo kun ano ang tuyo sang ila operation.
“Wala namang gagawa ng operation na sasabihin niya ano ang objective ng operation niya,” suno sa bise-presidente.
“Napaka-obvious naman siguro na parang tipong ang aming operation ay to make sure that she becomes president at ang pangalan ng operation namin ay ‘Save the Queen.’ Parang walang tanga na operator na ipapangalan mo sa operation mo kung ano ang objective mo,” padayon sini.
Sang ginpa-klaro sa iya kun magapadalagan gid man siya sa pagka-presidente sa 2028, ginsulit sini nga wala pa ini sa iya plano.#
