ILOILO – Indi nagakabagay nga mag-gamit ang isa ka manunudlo sang mga malaswa nga films kag iban pa nga mga teaching material ilabi na sa menor nga mga estudyante.
Ini ang pagpati ni Ajuy Iloilo SB Member Angel Briones kasunod sang isa ka film showing activity nga ginpatigayon sa duha ka section sang Grade 10 students sang Pili National High Scool sa Ajuy, Iloilo.
Sa interview sang Bombo Radyo kay Briones, iya ginpahayag nga may yara sang mga ‘intercourse’ sa amo nga film, kag sa iya paglaragway, ‘obscene’ kag indi pa pwede nga ipalantaw sa mga menor.
Dugang ni Briones, ini ang baliskad sa polisiya sang Department of Education (DepEd) nga dapat ‘wholesome’ kag ‘purely educational’ lamang ang itudlo sa estudyante.
Suno kay Briones, kun sex education ang ginapakigbato nga rason sang high school teacher, malayo ang standard sang iban nga pungsod kaangay sang United States ipaanggid sa pungsod Pilipinas.
Bisan ang alkalde sang banwa nga si Mayor Jett Roxas ang indi man pabor sa amo nga film suno kay Briones.
Kaangot diri, ginahingyo sang Sangguniang Bayan sa DepEd nga imbestigaran ang nasambit nga kaso.
Kun ano man ang ila mahimo nga konklusyun, “so be it” suno kay Briones — sa diin kun may iregularidad man, ‘calling’ na sang DepEd suno kay Briones kun ano ang ila himuon.
