𝗕𝗨𝗘𝗡𝗔𝗩𝗜𝗦𝗧𝗔, 𝗚𝗨𝗜𝗠𝗔𝗥𝗔𝗦 — Nagapati ang isa ka opisyal sang banwa sang Buenavista sa probinsya sang Guimaras nga may nagakatabo nga korapsyon sa likod sang Tindahan ng Bayan nga ginpatukod sang Local Government Unit (LGU) sang nasambit nga banwa.
Sa interview sang Bombo Radyo kay Atty. Vincent De Asis, Sangguniang Bayan Member sang Buenavista, Guimaras, iya ginpahayag nga dako ang nangin epekto sa mga vendors sang banwa sang Buenavista ang pagpatukod sang merkado sang amo nga banwa nga kuntani ang mga pumuluyo ang makabenepisyo.
Suno kay De Asis, duha na ka bulan sang nagsugod ang operasyon sang gintukod nga merkado, sa diin, nagapati ini pribado ang nagadumala apisar nga sa idalum ini sang Local Government Unit (LGU) sang banwa.
Ginpahayag man ni De Asis nga apisar nga wala sang resolusyon nga napasar agud pahanugutan nga maka-operate ang Tindahan ng Bayan, padayon ini nga nagpatuman sang operasyon nga nagtuga sang kompetisyon sa mga tumandok nga vendors sang banwa.
Bangud diri, ginkwestyon sang natungdan kun diin nagahalin ang pondo nga ginagamit agud nga maka-operate ang amo nga merkado.
Pagpaathag niya, indi makahatag ang gobyerno sang pondo bangud wala sang pormal nga napasar nga resolusyon nga nagasuporta sa amo nga programa.
Ginpakamalaut man sini ang paggamit sang mga kagamitan sang banwa, kaangay na lamang sang truck kag mga bantay dagat agud nga magkuha sang mga inogbaligya nga isda.
Tuyo man sang opisyal nga paimbestigaran ang nagakatabo nga korapsyon sa banwa sang Buenavista bangud tuman na ka damo nga vendors ang nagakaapektohan.
