Ginpalab-ot ni Bingawan, Iloilo Sangguniang Bayan Member Jofe Celeste ang iya personal experience sa pag-refer sang mga pasyente nga nagahalin sa district hospital sa probinsya sang Iloilo padulong sa Iloilo City.
Sa interview sang Bombo Radyo kay SB Celeste, iya ginpahayag nga tuman ka dako nga pagpanghangkat para sa mga pasyente kon indi makahatag sang salakyan ukon ambulansya ang isa ka hospital.
Suno kay Celeste, kapareho ini sa natabo sa iya nga bata nga may special needs sang Mayo 14, 2025 kon sa diin, nangluya ini kag kinahanglan sang gilayon nga pagbulong.
Gintuad sang opisyal nga nagpakig-angot sila sa ila banwa agud nga makapangayo sang Patient Transport Vehicle (PTV) kag madul-ong ang iya nga bata, apang nagpahayag ang Local Government Unit (LGU) sang Bingawan nga tubtob sa District Hospital sang Calinog lang sila.
Ginbuyagyag man sini nga kon luyag nila nga madul-ong sa syudad ang pasyente, magamit na lang sang pribado nga salakyan.
Nagapanghakroy man ini bangud wala sang kagamitan sa ambulansya para sa pasyente agud ma-sustain kontani ang kahimtangan sini tubtob makalab-ot sa ospital sa syudad.
Nagapati man ini nga ang nagakatabo sa pila ka banwa amo ang kinahanglan nga i-admit anay ang bata sa hospital agud nga makakuha sang bastante nga ambulansya para sa pasyente.
Gin-athag sini nga tinutuyo lamang niya nga mapanami ang referral system sang probinsya ilabi na kon emergency cases.
Nagpanawagan man ini kay Iloilo Governor Defensor Jr. nga mahatagan sang igtalupangod ang amo nga issue agud nga indi na masulit pa kag makatuga sang huol sa mga nagamasakit.
