ILOILO CITY – Nagpasalig ang mga senador nga tun-an ang problema sang Ungka flyover.
Ini matapos nga personal nga gindul-ong mismo ni Pavia Sangguniang Bayan Member Jose Maria “Pyt” Trimañez nga amo man ang chairman sang Committee on Transportation ang resolution sang municipal council nga nagahingyo sang pagpatigayon sang Senate inqury in aid of legislation sa depektibo nga flyover nga nagabalor sang P680 million.
Sa interview sang Bombo Radyo kay Trimañez, iya ginpahayag nga na-istorya niya mismo si Senator Bong Revilla nga amo ang chairman sang Committe on Public Works.
Nagpasalig sa iya si Revilla nga tun-an ang problema sa flyover apisar nga naka-recess na subong ang 19th Congress.
Ginkakibot man sang senador nga 16 gid ka mga piers sang flyover ang nag-usmod.
Dugang pa ni Trimañez, mangin si Senator Ronald Dela Rosa kag iban pa nga mga senador ang nagpasalig man nga buligan si Revilla sa pagtu-on sa reklamo sa flyover.
Sa subong, na-refer naman sa Committee on Public Works sa House of Representatives ang House Resolution 721 nga nagapangabay sang pagpatigayon sang legislative inquiry sa pagpatukod sang depektibo kag atrasado nga Ungka kag Aganan flyovers.
Una na nga ginpahayag ni Senator Imee Marcos nga nakadangat na kay Presidente Ferdinand Marcos, Jr. ang kontrobersyal kag madugay na nga isyu sa P680-million nga Ungka Flyover.
