Gintalana sang Korte Suprema sa Abril 1, 2025, sa Supreme Court Baguio Session Hall ang hearing sa petisyon nga nagakwestiyon sa constitutionality sang RA No. 12116 ukon ang General Appropriations Act of Fiscal Year 2025 (GAA).
Gin-file ang petisyon nanday Atty. Victor D. Rodriguez kag iban pa nga nagapanindugan nga ang GAA ang nagalapas sa Konstitusyon bangud nga wala ini nagpain sang mandatory funding para sa PhilHealth.
Iligal man suno sa ila ang pagtaas sang mga appropriation sang labaw pa sa rekomendasyon sang Presidente kag nagpain ini sang pinakamataas nga budget sa imprastraktura sa baylo nga sa edukasyon.
Ginaalegar man nga may mga blangko sa Bicameral Committee Report on the General Appropriations Bill.
Ang preliminary conference ang gintalana naman sa Pebrero 28, 2025, 1:00 P.M. sa Session Hall, SC Main Building, Manila.
Samtang, sa Abril 22, 2025, alas-2:00 sang hapon, ang hearing sa Supreme Court Baguio Session Hall para sa petisyon nga gin-file ni Sen. Aquilino Pimentel III batok kay Executive Sec. Lucas L. Bersamin, et al. nga nagakwestiyon sa gahum sang Republic Act No. 11954 ukon ang Maharlika Investment Fund Act of 2023.
Ginahingyo man sang petisyon nga magpagwa ang Korte sang temporary restraining order kag writ of preliminary injunction.
Ginlakip sang Korte bilang mga respondent sa kaso ang Bangko Sentral ng Pilipinas kag government banks kag ginmanduan ang mga ini nga mag-file sang ila mga komento sa sulod sang 10 ka adlaw.
Ang preliminary conference ang gintalana sa February 26, 2025, alas-2:00 sang hapon sa Session Hall, SC Main Building, Manila.
