Ginkumpirma sang Iloilo Provincial Police Office nga may mga scammer nga nagagamit sang pangalan sang mga hepe sang kapulisan sa probinsya.
Sa interview sang Bombo Radyo kay PLt. Col. Rolando Araño, Spokesperson sang Iloilo Provincial Police Office, iya ginpahayag nga nalakip sa mga pangalan sang hepe amo sanday Police Captain General Enrique Robles sang Leganes kag Police Lieutenant Cosmeflor Marco, Jr. sang New Lucena.
Suno kay PLt. Col. Araño, ang target sang mga nasambit nga scammers amo ang mga small establishments kaangay sang mga pharmacy.
Ang ila modus sa pag-scam amo nga nagatawag ang mga ini sa mga botika gamit ang mga pangalan sang hepe agud nga makakuha sang mga bulong.
Kasunod sini, ginmando na ni Iloilo Provincial Police Office Director Police Colonel Bayani Razalan nga magpatigayon sang inspection sa mga gagmay nga mga establisyamento ilabi na sa mga botika agud nga mapaandaman ang mga ini sang mga nagakadapat nga mga ubrahon sa mga kaangay nga mga insidente.
Sa subong, padayun pa ang imbestigasyon sa nasambit nga scamming incident kag nagpaandam man ang kapulisan nga manabat gid sa layi ang mga scammers.
