ILOILO CITY – Ginatan-aw sang Kongreso ang pag-realign sang pondo sang mga ahensiya kag departamento sang gobyerno para mahatagan sang pondo ang libre nga edukasyon sa mga state universities and colleges (SUCs).
Sa interview sang Bombo Radyo Iloilo, ginpahayag ni House Appropriations Committee chairman Rep. Karlo Alexei Nograles nga plano nila nga kuhaon ang mga scholarship fund sa mga ahensiya sang gobyerno kag himuon nga pondo para sa libre nga edukasyon sa kolehiyo.
Kun tingbon suno sa mamalidha ang mga scholarship fund nga ini, nagalab-ot sa P16 billion nga mahimo gamiton bilang initial fund para sa libre nga edukasyon.
Plano man sang Kongreso nga buhinan ang pondo sang iban nga ahensiya sang gobyerno nga sobra ang pondo.
Ginhalimbawa ni Nograles ang Department of Information and Communications Technology (DICT) nga sang 2016 may P2.7 billion nga pondo nga wala magasto samtang P2.5 billion naman sang 2017.
Sa Department of Transportation, natukiban sa ginpatigayon nga budget hearing sang komite ni Nograles nga P30 billion nga pondo sang ahensiya ang wala magasto sang 2015 kag P30 billion man sa 2016.
Mahimo ini ideklarar suno kay Rep. Nograles nga savings kag gamiton nga pondo para sa tuition sang mga estudyante sa SUCs.