ILOILO CITY — Gintinghuwaan sang mga school heads nga ma-comply sang mga estudyante ang mga requirements samtang nagasunod-sunod ang kanselasyon sang klase bangud man sa mainit nga tyempo.
Sa interview sang Bombo Radyo kay Alexis Rivas, principal 4 sang Jalandoni Memorial Elementary School, iya ginpahayag nga kapin duha na ka bulan sang nagsugod ang pagpatuman sang blended learning sa mga buluthuan bangud sa indi masarangan sang kabataan ang heat index ukon ang kainit.
Suno kay Rivas, ginalagas nga matapos ang mga requirements agud mahatagan sang final grade ang mga estudyante bangud nagahilapit na nga magtakop ang school year subong nga bulan sang Mayo.
Ginaduso naman sang manunudlo nga kinahanglan nga i-assist sang ginikanan ang ila kabataan agud magiyahan ini sa pagtuon kag indi manubo ang mabaton nga grado.
Nagpasalig naman ang natungdan nga ginasunod sang buluthuan ang direktiba sang Department of Education (DEPED) Region 6.
