GUIMARAS – Masobra sa 600 ka mga Senior High School Student ang nagpatigayon sang coast clean-up sa Nueva Valencia, Guimaras.
Sa interview sang Bombo Radyo kay Hazel May Pillon, adviser sang mga estudyante sang Cabalagnan National High School sa Nueva Valencia, Guimaras, iya ginpahayag nga ginabanta nga naglab-ot sa 650 ka High School Students ang nagpakigbahin sa Science Camp nga ginbansagan nga Kalikasciene.
Suno kay Pillon, ang nasambit nga science camp ang ginpatigayon sang Oktubre 4 tubtub 5 sa diin isa sa ila mayor nga aktibidad amo ang ginpatigayon sang clean-up drive.
Ginpahayag ni Pillon nga magluwas nga nagkinasadya kag nakatuon ang science campers, nakabulig man sila agud nga matinlu-an ang palibot.
Samtang, suno naman kay KC Faith Gadnao, isa sa mga science campers, masobra sa 30 ka sako sang basura ang ila natipon.
Bag-o pa man ang coastal clean-up suno kay Gadnao, nagpatigayon sila sang fun run sa diin samtang nagadalagan, nagapamulot man sila sang basura sa alagyan.
Kalabanan sa ila nakuha nga mga basura suno kay Gadnao amo ang recyclable materials.
