Nagdugang si Scottie Thompson sa lista sang Filipino players nga indi makaupod sa hampang sang Gilas Pilipinas sa Fiba Olympic Qualifying Tournament sa Latvia.
Suno sa website sang Philippine Basketball Association (PBA), ginasuprer pa sang former PBA MVP ang bulging disc — ang injury nga iya naangkon sa Philippine Cup semifinals kun sa diin nalutos man ang Ginebra batok sa reigning champions nga Meralco.
Base sa mga laragway nga gin-post sang Inspire Sports Academy sa Laguna, ang present lamang sa una nga adlaw sang training amo ang naturalized player nga si Justin Brownlee, Kai Sotto, June Mar Fajardo, Chris Newsome, Dwight Ramos, CJ Perez, Carl Tamayo, Calvin Oftana, kag Kevin Quiambao.
Yara man si former PBA import kag newly appointed Far Eastern University head coach Sean Chambers amo man ang Barangay Ginebra players nga sanday Ralph Cu kag Donald Gumaru.
Naghanas man sa camp sanday Japeth Aguilar kag Mason Amos nga amo ang magabulos kanday AJ Edu kag Jamie Malanzo nga pareho man nga nagasuprer sang injuries.
Antes magsabak sa Latvia para sa Olympic qualifiers, atubangon anay sang Gilas ang Taiwan Mustangs sa isa ka exhibition match sa Lunes sa PhilSports Arena sa Pasig. Sa aktwal na nga OQT sa Hulyo 3-4, maatubang sang Pilipinas ang host nation kag ang Georgia.
