Nagtaliwan na ang beterano nga Filipino film and theater actor nga si Victor Laurel ukon mas kilala nga si Cocoy Laurel.
Wala ginsapubliko sang pamilya ang rason sang iya kamatayon apang ginkumpirma nga nagtaliwan ini sang nagligad nga Sabado, Hunyo 14, tatlo ka bulan lang matapos ang iya 72nd birthday.
Si Cocoy ang anak ni anay Vice President Salvador “Doy” Laurel kag theater actress and singer nga si Celia Diaz Laurel.
Tiyo siya sang aktres nga si Denise Laurel, kag utod niya ang popular 80s singer nga si Iwi Laurel.
Katapusan nga nakit-an si Cocoy sang Abril sang nagkadto ini sa haya sang National Artist nga si Nora Aunor nga amo anay ang iya onsceen partner kag suod man nga abyan.
Nangin bida sila nga duha sa mga pelikula kaangay sang “Lollipops and Roses”, “Lollipops and Roses at Burong Talangka,” kag “Impossible Dream.”
Sa teatro naman, nagpasundayag man anay si Cocoy mga produksyon sang Repertory Philippines lakip na sa “Les Miserables”. Nangin parte man siya sang original London cast sang “Miss Saigon” kaupod kay Lea Salonga.
Matapos ang iya madinalag-on nga karera sa entertainment industry sa Pilipinas, nangin masako man ini sa isa pa ka maduagon nga parte sang iya kabuhi nga amo ang pag-paint samtang yara sa Madrid, Spain.
