ILOILO CITY–Wala sang may nakita ukon nakuha nga armas-luthang gikan sa balay sang isa ka Brgy. Kagawad sang Concepcion, City Proper sa ginpatigayon nga search warrant implementaion.
Ini ang kasunod sang reklamo batok kay Brgy. Kagawad Tomas Flores Sr. nga ginapahayag masami nagapakawal sang armas-luthang.
Sa interview sang Bombo Radyo kay Police Superintendent Jonathan Pablito, hepe sang Police Station 1, iya ginpahayag nga may nabaton sila nga reklamo tuhoy sa masami nga pagpakawal snag armas-luthang ni Flores.
Sakop sang search warrant suno kay Pablito amo ang balay ni Flores.
Ginpahanumdum ni Pablito nga ginadumili-an ang pagpakawal sang armas-luthang ilabi na kun wala sang lisensya.
Samtang, ginakalipay naman ni Brgy. Kagawad Tomas Flores nga nagnegatibo ang ginpatigayon nga pagpatuman sang search warrant sa iya balay.
Sa interview sang Bombo Radyo kay Flores, iya ginpahayag nga patu-patu lamang  nga may yara siya sang ginahuptan nga armas-luthang.
Ini bangud nga suno kay Flores, isa siya sa nagasuporta kay Punong Brgy. Madonna Martin.
Sa pagkamatuod suno sa Barangay Kagawad, siya ang chairman sang Committee on Peace and Order sa ila lugar kag wala man siya sang may gina-agrabyo nga isig ka tawo.