ILOILO CITY – Nagakahangawa ang isa ka Overseas Filipino Worker nga indi na makabalik sa trabaho bangud sa atrasado nga pagpaguwa sang resulta sang Reverse Transcription Polymerase Chain Reaction (RT-PCR) test.
Sa interview sang Bombo Radyo sa Seafarer nga nagpahinago lang sang pangalan, iya ginpahayag nga sa Setyembre 11 na ang iya nga pagbalik sa trabaho kag subong kun tani, kinahanglan na niya nga tapuson ang pagproseso sang iya dukomento.
Suno sa tagreklamo, nagapabilin siya sa isa ka hotel sa syudad sang Iloilo kag indi makaguwa kun wala sang health clearance kun sa diin requirement ang negatibo nga RT-PCR test result.
Sa pagkamatuod suno sa tagreklamo, sang Agosto 29 pa siya ginkuhaan sang swab sample apang tubtub subong, wala pa ang resulta sang iya COVID-19 test.
Ginpahayag naman ni Public Safety and Transportation Management Office head Jeck Conlu nga nagaserbe man nga focal person for COVID-19, nga amat-amat na nga ginatapos ang backlogs sa Western Visayas Medicak Center Sub-National Laboratory.
Indi man mahinago suno kay Conlu nga may pila ka technical staff nga nagpositibo sa COVID-19 rason nga gin-lockdown ang nasambit nga laboratoryo.
Ang mga nauna nga backlogs suno kay Conlu ang natapos na apang bangud nga may mga specimen nga naga-abot sa tagsa ka adlaw kag kulang ang manpower, amat-amat lang ang pagproseso sini.
Ang specimen nga ginkuha sang Agosto 29 suno sa natungdan ang mahimo nga matapos subong nga semana.
Target sang Department of Health nga malab-ot ang 48-hour turn around time sa masunod nga bulan paagi sa pagdugang sang COVID-19 laboratory sa syudad kag probinsya sang Iloilo.
