Patay ang isa ka seafarer samtang padayun naman nga ginabulong ang nurse sini nga asawa sang mahulog ang ila salakyan sa suba sa boundary sang Brgy. Masayo kag Brgy. Arobo, Tobias Fornier, Antique.
Ang gindulaan sang kabuhi amo si Sheridan Sansaet,40-anyos samtang ang asawa sini amo si Cookie Sansaet, lunsay mga residente sang Brgy. Villaflor, Tobias Fornier.
Sa interview sang Bombo Radyo kay Police Staff Sergeant Anthony Pelingon, imbestigador sang Tobias Fornier Municipal Police Station, iya ginpahayag nga halin sa isa ka event ang mag-asawa sa San Jose Antique kag papuli na kuntani sa ila.
Suno kay Pelingon, ginapatihan nga napiyungan ang driver rason nga wala sini natantyar ang gin-agyan sa diin naglapaw ini sa taytay kag nahulog sa suba ang salakyan.
Dugang pa sang natungdan nga nakagwa gilayon ang asawa apang nabilin ang bana sini sa sulod sa diin madalom pa ang tubig.
Padayun pa ang imbestigasyon sang kapulisan sa natabo nga insidente.
