PASSI CITY, ILOILO– Ginreklamo ang isa ka seaman bangud man sa pagpanaya sang pusil sa Poblacion Ilawod Simeon Aguilar Street Passi City.
Ang ginreklamo ang ginkilala nga si Noel Panes, 37 anyos, isa ka seaman kag residente sang Sarla Street Passi City, samtang ang mga biktima naman ang ginkilala nga sanday Jose Susteguer 21 anyos kag Alemar, Coronel, 20 anyos residente sang Imbang Pequeño San Enrique Iloilo.
Sa interview sang Bombo Radyo kay Police Staff Sergeant Roderick Larido, imbestigador sang Passi City Police Station, iya ginpahayag nga naga-inom-inom ang nasambit nga mga persona sa isa ka lugar sa nasambit nga syudad.
Suno kay Larido, samtang yara sa ilimnan, may natabo nga pagtulukay kag sang naggawa na ang mga biktima, gulpi lang nga nagpanaya sang pusil si Panes.
Nakuha naman sa posisyon ni Panes ang isa ka 9mm pistol nga wala sang lisensya.
Gilayun naman nga nakapyansa sang halos P60,000 si Panes matapos gin-aresto sang kapulisan.
