𝗜𝗟𝗢𝗜𝗟𝗢 𝗖𝗜𝗧𝗬 – Wala sang katupong nga kalipay ang nabatyagan sang isa ka seaman matapos natuman ang iya childhood dream nga mangin isa ka doktor.
Ini amo si Vincent Eldion Sumagaysay Javellana sang Lebak, Sultan Kudarat.
Nagdako naman ini sa Barotac Nuevo sa diin tumandok ang iya amay.
Sa interview sang Bombo Radyo kay Javellana, iya ginpahayag nga 10 ka tuig ang nagligad, nagtapos ini sa kurso nga Marine Transportation sa Maritime Academy of Asia and the Pacific tubtob nangin isa ka seaman.
Suno kay Javellana, nangin seaman ini bangud man sa impluwensya sang iya pamilya sa diin ang mga lalaki nga utod sang iya iloy kag amay ang lunsay seaman.
Bilang isa ka seaman, madamo naman ini sang mga nakadtuan nga mga pungsod sa diin nag-umpisa ini sang 2015.
Apang sang Nobyembre 2018, nagdesisyon ini nga magpanaog sa barko kag ginpadayon ang iya childhood dream nga mangin isa ka doktor.
Apisar wala ini nakakuha pre-med nga kurso, wala ini nangin upang agud magtuon si Javellana sang medisina.
Nagtapos naman ini sang medisina sa West Visayas State University sa La Paz, Iloilo City.
Sa ginpagwa naman nga October 2024 Physicians Licensure Examination, nakapasar si Javellana.
Nahibaluan nga si Javellana ang pinakauna nga doktor sa ila pamilya.
