Seaman nga taga-Oton, Iloilo, isa man sa mga missing sa naglugdang nga cattle ship sa Japan

ILOILO CITY-Ginkatingala sang pamilya sang isa ka Ilonggo seafarer nga residente sang Cagbang, Oton, Iloilo kag isa sa mga crew sang naglugdang nga Gulf Livestock 1 sa Japan, nga wala na ini naka-video call sa ila sa sulod sang pila ka adlaw.

Sa interview sang Bombo Radyo kay Rowillyn Turija, asawa sang seaman nga si Leonido Turija Jr. nga may rangko nga Bosun, iya ginpahayag nga regular nga nagatawag sa iya kabataan ang iya bana apang sang Martes tubtob Huwebes,Setyembre 1 tubtob 3, wala na ini makatawag.

Suno kay Turija, sa Bombo Radyo na lang niya nabatian ang natabo gani gilayon niya nga gintawagan ang Korpil Shipmanagement and Manning Corporation kag nakumpirma niya nga ang barko nga ginasakyan sang iya bana ang naglugdang.

Nagpanawagan man ini sa gobyerno sang mga pungsod nga malapit sa ginluntaran sang trahedya nga magbulig para sa mas madasig nga search and rescue operation.