JAPAN – Ginpadayon na sang Japanese Coast Guard ang search and rescue operation sa mga missing nga crew sang Gulf Livestock 1 nga naglugdang sa Japan bangud sa epekto sang bagyo Maysak.
Suno kay Bombo International Correspondent Josel Palma, aerial search and rescue operation ang ginapatigayon sang Japanese Coast Guard sa kalalawran nga sakop sang Kagoshima prefecture sa Kyushu Island epektibo Setyembre 7.
Ginpahayag ni Palma nga delikado pa sa subong ang paglayag sang vessel sa kadagatan bangud nga mabatyagan sa gihapon ang mamadlos nga hangin kag mabaskog nga balod.
May kaangtanan naman sa epekto sang nasambit nga bagyo, lubos nga naapektuhan ang Southern islands sa Japan kun sa diin na record ang pagkalaguba sang balay, power outages kag pagbaha.
May kaangtanan naman sa mga Ilonggo crew nga missing kasunod sang nasambit nga trahedya, ginpahayag ni Gov. Arthur Defensor Jr. nga siyam sa 43 ka crew sang barko ang residente sang probinsya sang Iloilo.
Nakapakig-angot na sa iya suno kay Defensor ang pamilya sang walo ka missing crew.
