Mahimo i-serbe ang search warrant ano man nga oras.
Sa exclusive interview sang Bombo Radyo kay Atty. Joenar Pueblo, Constitutional law expert, iya ginpahayag nga nagakadapat nga nga may mando ang hukom ukon judge nga gab-i ukon sa adlaw i-serbe ang search warrant.
Suno kay Pueblo, masami nga sa adlaw ginaserbe ang search warrant apang kun ang subject ang isa ka delikado nga tawo ukon may posibilidad nga malagyo mahimo ini nga i-serbe sa tyempo kaangay sang gab-i ukon kaagahon.
Ini ang kaangot sa natabo nga pagserbe sang search warrant sa Tapaz, Capiz kag Calinog, Iloilo sa diin nagwangal ang mga subject bangud kaagahon ini ginpatuman.
Gin-athag sang abogado nga case to case basis ang matabo sa pagserbe sang search warrant kaangay sang mga ginapatihan rebelde ukon kahimbon nila.
Nagadugay lamang suno sa natungdan sa pulo ka adlaw ang validity sang search warrant kag matapos ini, nagakadapat magreport ang mga otoridad sa korte sa ginpatuman nga operasyon.
Matandaan nga siyam ang patay kag 16 ang naaresto sa pagserbe sang search warrant sa nasambit nga operasyon.
