Gintumod sang isa ka seasoned educator ang pila ka posible nga mga kabangdanan sang tuman ka taas nga numero sang Filipino junior kag senior high school graduates halin sang 2019 tubtob 2024 nga ginakabig nga “functionally illiterate.”
Base sa data sang Philippine Statistics Authority (PSA), 18 million nga mga graduates sang basic education system ang indi makahibalo magbasa kag indi man makahangop sang simple nga mga istorya.
Sa interview sang Bombo Radyo kay Dr. Reynand Dumalaon, Faculty of Arts and Education, Curriculum and Pedagogy sa University of Auckland, New Zealand, iya ginpahayag nga isa ang kapigaduhon, kakulang sang pasilidad, kag ang tuman ka damo nga trabaho sang mga manunudlo ang kabangdanan kun nga madamo ang “functionally illiterate” nga mga graduates.
Suno kay Dumalaon, makatilingala man nga kun san-o pa gindugangan sang duha ka tuig ang pag-eskwela sang mga estudyante bangud sa Kto12 program,diri man nga nagtuhaw ang amo nga problema.
Apang gin-athag niya nga indi man pwede mabasol ang bag-o nga curriculum nga Kto12 bangud katuyuan sini nga maka-compete ang mga Filipino students sa international arena.
Ginsiling man niya kun iangot gid man ini sa Kto12, kinahanglan gid anay sang mas bastante nga data kag mga pagpanalawsaw tuhoy diri.
Suno kay Dumalaon, sa subong, kinahanglan nga makahimo ang mga policymakers nga maghimo sang mga strategies kag programa sa sektor sang edukasyon nga indi lang base sa kon ano ang uso kundi sa kon ano ang matuod nga kinahanglan sang mga estudyante kag ini ang dapat nga gintun-an sang mayo.
