ILOILO CITY – Liwat nga buhi-on sang Iloilo Provincial Government ang seaweed production nga isa sa pinadako nga industriya sa probinsya.
Suno kay Iloilo Governor Arthur Defensor, Jr., magluwas sa banwa sang Estancia kag Carles nga dako nga producer sang seaweeds, makabig man nga potential sites ang Concepcion, Ajuy, kag San Dionisio.
Apisar nga ang Iloilo ang nangin pioneer sa seaweed production sa bilog nga Panay antes pa man nalapawan sang Antique, nagnubo ang production bangud sa climate change kag bangud nga nadulaan naman sang gana ang mga seaweed farmers.
May kaangtanan sa plano nga ini, hiwaton ang pinakauna nga seaweed summit sa Abril 14 -15 bilang isa sa mga aktibidad sa ika-122 nga founding anniversary sang probinsya.
Ini ang gin-organize sang Local Economic Development and Investment Promotion Center, Provincial Agriculture’s Office, University of the Philippines-College of Fisheries and Ocean Sciences, kag Bureau of Fisheries and Aquatic Resources Region 6.
Masobra naman sa 150 nga mga seaweed farmers kag iban pa nga stakeholder ang ginalauman nga magpasakup sa summit.
Sa interview naman sang Bombo Radyo kay Dr. Ildefonso Toledo, pinuno sang Iloilo Provincial Agriculture Office, iya ginpahayag nga madugay na nga may ginahatag nga technical assistance kag iban pa nga mga kinahanglanon sa mga seaweed growers.
Base sa sabat sang organisasyon, dugang ini nga income para sa ila.
