ILOILO CITY – Maabot sa syudad sang Iloilo bwas, Hunyo 2 si Sec. Carlito Galvez Jr., chief implementer sang National Policy Against Covid-19.
Sa interview sang Bombo Radyo kay Iloilo City Mayor Jerry Treñas, iya ginpahayag nga kinahanglan ipakita sang mga taga-Iloilo ang ginahimo nga mga inisyatibo sa pagpakig-away batuk sa Coronavirus Disease 2019 (COVID-19).
Suno kay Treñas, luyag ni Galvez nga bisitahon ang lugar nga ginaduso sang Iloilo City Government agud mangin Covid-19 laboratory kag dormitory nga yara nahamtang sa distrito sang Molo.
Mangayo bulig ang alkalde kay Galvez agud nga mapadasig ang accreditation sang laboratoryo kag mapadasig ang pagpatigayon sang Covid-19 testing.
Sa pagbisita ni Galvez, may dal-on ini nga rapid diagnostic test (RDT) kits, reverse transcription-polymerase chain reaction (RT-PCR) test kits, kag personnel protective equipment (PPE) para sa mga probinsya sa Panay.
