Iloilo City – Gintawag ni Elmer Forro, Secretary General sang Bayan Panay, nga epal ang Officer-In-Charge sang Iloilo City Police Office nga si Police Colonel Joeresty Coronica kadungan sang ginpatigayon nga hublag protesta may kaangtanan sa pagkomemorar sang 1986 EDSA People Power Revolution.
Sa interview sang Bombo Radyo kay Mr. Forro, iya ginpahayag nga antes gin-aprubahan ang ila nga permit sang Pebrero 22, nagpadala sang sulat si Coronica sa iya organisasyon nga nakasaad nga indi ini magsugot sa hublag protesta nga himuon bangud makatuga ini sang pagpugok sang trapiko sa dalan.
Suno naman kay Forro nga wala sang otoridad ang pulis sa pag-approve ukon dis-approve sang permit bangud indi sila ang lokal nga gobyerno sa syudad.
Daw kaangay pahayag sang natungdan nga indi luyag ni Coronica nga respetuhon ang pagdumdom nila sang 1986 EDSA People Power Revolution.
Ang masubo pa gid dugang ni Forro amo nga ginbalabagan pa sang mga pulis ang mga estudyante sa University of the Philippines – Visayas nga mag-upod sa paghublag protesta.
Humalin sa mga nagligad nga mga director sang Iloilo City Police Office suno kay Forro, nangin malinong, matawhay kag demokratiko ang nangin hublag protesta sang mga progresibo nga grupo.
