ILOILO – Hugot nga ginpanginwala sang Secretary General sang Bagong Alyansang Makabayan-Panay nga si Mr. Elmer Forro nga wala siya nakapalapit sa Lambunao, Iloilo sang Abril 7 kun sa diin isa ka ambush ang natabo.
Ini ang kasunod sang kumpirmasyon sang Philippine National Police kag sang Philippine Army nga yara ang presensya ni Forro rason nga ginpasakaan siya sang murder kag multiple attempted murder nga kaso.
Sa interview sang Bombo Radyo kay Forro, iya ginpahayag nga sang tion nga natabo ang ambush, ginapatuman ang community quarantine kag masako siya sa pagpatigayon sang relief operations para sa mga apektado sang lockdown.
Bilang kilala nga kritiko sang gobyerno, ginpahayag ni Forro nga megaphone kag microphone gid lamang ang iya nahibalu-an nga uyatan kag indi armas.
Sa pagkamatuod suno kay Forro, kasubong nga may pattern ang ginahimo sang otoridad kun sa diin ang natabo sa iya ang indi isolated case bangud nga sang damlag lang, may mga kaupdanan siya nga ginpasakaan sang kaso kag gindakop bangud sa pagpatigayon sang hublag protesta.
Apisar sini, ginpahayag sang natungdan nga wala siya mahadlok nga mapreso apang ang iya lang nga ginakahangaw-an amo nga mahimo nga gina-pressure sang gobyerno ang otoridad nga dakpon ang mga kilala nga kritiko.
