ILOILO – Hugot nga ginpanindugan sang Secretary General sang Bagong Alyansang Makabayan-Panay nga si Elmer Forro nga indi siya kabahin sang communist terrorist group.
Ini matapos nga isa siya sa tatlo ka mga ginpakasaan sang kaso nga murder kag multiple attempted murder may kaangtanan sa natabo nga ambush sa Lambunao, Iloilo sang Abril 7.
Sa interview sang Bombo Radyo kay Forro, iya ginpahayag nga Agosto 13 sang iya nabaton ang summon may kaangtanan sa kaso nga ginpasaka sang Lambunao PNP.
Suno kay Forro, kaupod niya nga ginpasakaan sang kaso amo ang duha pa ka aktibista nga ginkilala lamang sa alyas nga pangalan.
Ginpahayag ni Forro nga madugay na siya nga aktibista apang indi siya makabig nga terorista.
Antes pa man ang ginkaulamiran nga kaso, ginpahayag sang natungdan nga may mga poster pa nga naglinapta kun sa diin nakita nga yara ang iya nawong nga isa ka terorista.
Ginakabig naman sang natungdan nga isa ka harassment ang pagpasaka sang non-bailable nga kaso batok sa iya.
