Gindeklarar sang Securities and Exchange Commission (SEC) Region 6 nga isa ka iligal ukon investment scam ang operation sang Chiyuto Creative Wealth Document Facilitation Services ukon Chiyuto Double Your Money Scheme.
Ini nga kompaniya ang ginapamunuan ni Patrocenio Chiyuto ukon mas kilala sa tawag nga Don Chiyuto sa probinsya sang Capiz.
Sa exclusive interview sang Bombo Radyo kay Atty. Russel Ildesa, Director sang SEC Region 6, iya ginpahayag nga ang modus sang nasambit nga kompaniya amo ang pagganyat sa mga tawo nga mag-invest sang kwarta sa diin magadoble ini pagkatapos sang 30 ka-adlaw.
Madamo na suno kay Ildesa ang nabiktima sang Chiyuto Creative Wealth Document Facilitation Services sa diin posible nga sa una lang magahatag sang payout apang sa ulihi, gulpi lang madula ang kwarta nga gin-invest.
Ginbuyagyag man ni Ildesa nga bisan makaisa wala makaparehistro ang nasambit nga kumpaniya sa SEC sang Certificate of Authorization Permit agud nga mag-operate.
Pahayag sang abogado, may yara sang permit nga narekord ang kompaniya sa Department of Trade and Industry (DTI) apang gin-athag niya nga indi ini lehitimo.
Ini man ang rason nga indi na makakuha sang Mayor’s permit si Don Chiyuto bangud wala siya sang SEC authorization to engage in investmest scheme ukon magkolekta sang kwarta.
Dugang pa sa natungdan, sa subong, naka red flag na ang kumpaniya sa Securities and Exchange Commission sa diin indi na ini makakuha sang permit bangud sa lapnagon nga mga pagpangtunto.
