𝗜𝗟𝗢𝗜𝗟𝗢 – Ginpasalig sang kapulisan sa Iloilo Province nga magaserbe nga leksyon sa ila ang mga nagwa nga mga issue sa ginpatigayon nga hearing in aid of legislation sang Committee on Public Order and Security sa Sangguniang Panlalawigan.
Ini may kaangtanan sa reklamo ni Iloilo 5th district Board Member Carol-V Espinosa-Diaz sa ginaalegar armado nga mga kalalakihan nga natukiban mga security guard nga nag-upod sa parada sa pagbukas sang kapistahan sang Ajuy, Iloilo.
Si Espinosa-Diaz ang nagapadalagan bilang alkalde sa nasambit nga banwa.
Sa interview sang Bombo Radyo kay Police Colonel Bayani Razalan, director sang Iloilo Police Provincial Office, iya ginpahayag nga may yara sang administrative violation ang security agency.
Suno kay Razalan, base sa imbestigasyon sang Regional Civil and Security Unit 6, ang 12-gauge shotgun nga ginparada sang mga security guard ang lisensyado sa idalom sang pangalan sang Enforcement Security and Investigation Agency.
Apang, sa pagdala ukon bitbit sang pusil sa nagkalain-lain nga lugar, base sa Republic Act 11917 ang nagakadapat nga may Special Duty Detail Order ang security agency apang wala nakahatag ang agency.
Magluwas nga napaslawan maghatag sang Special Duty Detail Order ang Security Agency, wala man ini nakahatag sang Security Providers Contract Agreement kaupod ang kliyente sini kag dapat naka-notaryo.
Base sa kapulisan, bangud sa paglapas sa certain provision, may multa nga baydan ang security agency.
Gindugang man sang kapulisan nga indi makabig nga private armed group ang mga lalaki nga armado bangud may license to operate ang security agency, rehistrado ang mga armas kag mangin mga security guard.
Ginpahayag ni Razalan nga indi man magpasaka sang kaso si Espinosa-Diaz sa security agency, apang ginpanugyan sini nga kuntani indi na masulit pa ang kaangay nga insidente.
