Nadakpan sang Criminal Investigation and Detection Group (CIDG) Iloilo kag Mandurriao Police Station ang isa ka security guard bangud sang iligal nga pagbaligya sang armas sa Barangay Q. Abeto Mirasol, Mandurriao, Iloilo City.
Ang arestado amo si Stephen Brito, 35, residente sang Barangay Rizal Pala-Pala 1, City Proper.
Sandig sa accomplishment report sang CIDG, nabaklan sang poseur buyer ang suspek sang duha ka units sang caliber .45 pistol kag isa ka unit sang caliber .38 revolver.
Nakumpiska man sa sulod sang armored vehicle nga gingamit sang suspek amo ang isa ka unit sang 12 gauge shotgun.
Nagapangatubang ang amo nga security guard sang kaso nga paglapas sa Republic Act 10591 ukon Comprehensive Law on Firearms and Ammunitions Regulation Act.
