Dakop sa drug buy-bust operation sang City Drug Enforcement Unit ukon CDEU ang isa ka security guard matapos makuhaan sang ginabulubanta P1.7 million nga balor sang shabu sa Barangay Loboc, Lapuz, Iloilo City kagab-i, Mayo 25.
Ginkilala ang suspek kay alyas “William” legal ang pang-edaron kag residente sang Barangay Rizal Estanzuela, City Proper.
Sa interview sang Bombo Radyo kay Pcapt Roque Gemino III, head sang CDEU, ginpahayag sini nga halos tatlo ka bulan nga ginmonitor sang mga kapulisan ang suspek antes ini nadakpan sa operasyon.
Nakuha sa subject ang apat ka bulto kag mga heat-sealed transparent plastic sachet sang shabu.
Pahayag pa ni Roque, tatlo ka mga upod pa nga security guard sang suspek ang nagakuha man sang dalagko nga supply sang iligal nga droga kag ginabaligya ini sa nagkalain-lain nga bahin sang syudad.
Dugang pa ni gimeno nga mapalagyo pa kuntani ang suspek apang gilayon ini nga nadakpan sang mga operatiba.
