Patay na sang nasapwan ang isa ka security guard sa iya ginatiniran nga boardinghouse sa Brgy. Danao, City Proper.
Ini amo si Peter, 38, tumandok sang Libo-o, Dingle, Iloilo.
Sa interview sang Bombo Radyo kay Police Captain Roque Gimeno III, hepe sang Iloilo City Police Station 1, iya ginpahayag nga nasapwan sang isa man ka guwardiya ang lawas sang biktima nga mayami na samtang yara ini sa sulod sang iya hulot.
Sa pagpangusisa sang pulis, natukiban nga nakapanugid ini kahapon nga nagapalanglamig na siya.
Sang aga, nagtawag ang iloy sini sang makapila ka beses apang wala na sang nagasabat sa cellphone. Ang kaupod na lang sini nga guwardiya ang nag-check bangud wala nagauntat ang pagtunog sang cellphone.
Ginapatihan nga wala sang foul play sa kamatayon sini bangud wala sang injury ang lalaki, wala man sang nadula sa iya kagamitan, kag wala man sang nakit-an nga senyales nga ginsulod ini sa kuwarto.
Nagpahayag man ang pamilya nga indi na pag-ipaidalom sa autopsy ang bangkay.
