Pasakaan na sang kaso nga Murder subong nga adlaw, Abril 5, ang suspek nga security guard nga nagluthang-patay sa isa ka delivery food rider sa Robinson’s Place – Main, corner Quezon kag J. De Leon Streets, Iloilo City Proper.
Ang biktima amo si Joemar Sanchez, 29, residente sang Brgy. Bitoon, Jaro, Iloilo City kag delivery boy sang Food Panda.
Samtang ang suspek naman amo si Argie Solis, security guard sang Malayan Bank sa Quezon Street kag kabahin sang security agency nga Grabato Investigation Risk Management and Security Service Incorporated kag residente sang Barangay Maria, Laua-an, Antique.
Sa exclusive interview sang Bombo Radyo kay Police Captain Shella Mae Acanto Sangrines, hepe sang Iloilo City Police Station 1, iya ginpahayag nga napun-an sang paghinulsol ang mga nangin pahayag sang suspek matapos naatubang ang mga himata sang iya ginpatay nga food rider.
Suno kay Sangrines, sa pihak sang masubo nga hitabo, nagapasalamat ang pamilya Sanchez nga mahatagan na sang hustisya ang ila himata.
Nahibaluan nga sa idalom sang Revised Penal Code, ang kaso nga murder ang may silot nga reclusion perpetua sa diin mapreso ang suspek sa sulod sang 20 ka tuig kag isa ka adlaw tubtob 40 ka tuig.
Matandaan nga Marso 31, sang natabo ang kontrobersyal nga insidente sa diin nagpaligo sa kaugalingon nga dugo si Sanchez sang ginluthang ini sang gwardya nga si Solis bangud sa ginapahayag impito tuga sang pagbaisay matapos nabasa ang log book sang gwardya sang gintungtungan sang food panda rider sang plastik nga may unod nga pagkaon.
