Arestado ang isa ka security guard bangud sa pagpalupok sang pusil sa Ilawod, Barotac Nuevo, Iloilo.
Sa interview sang Bombo Radyo kay PLt. Johnny Bundac, hepe sang Barotac Nuevo Municipal Police Station, iya ginpahayag nga isa ka concerned citizen ang nagpalab-ot sang reklamo sa police station rason nga ginrespondehan nila ini.
Suno kay Bundac, ginaalegar nga pila ka beses nga nagpalupok sang pusil sa atubang sang isa ka business establishment kun sa diin ini naka-duty.
Pahayag ni Bundac, sang naabtan nila ang gwardiya, hubog ini kag na-recover man sa lugar ang anum ka basiyo kag loaded nga magazine.
Ginsiling naman sang gwardiya nga service firearm niya ang ginataklos nga 9mm pistol apang wala man sang mapakita nga legal nga dokumento.
Preso na ini subong kag natalana nga pasakaan sang kaso nga paglapas sa RA 10591 ukon Comprehensive Firearms and Ammunition Regulation Act, kag Illegal Discharge of Firearm.
