Arestado ang isa ka security guard nga assigned sa Department of Public Works and Highways Region 6 sa Muelle Loney, Iloilo City Proper matapos nga gin-alegar nga nagpangtaya sang armas-luthang kag ginkasahan pa ang kaangay nga gwardiya.
Ang ginreklamo nga guard amo si Jeran Espinosa, 38 anyos, residente sang Poblacion, Ajuy, Iloilo kag ginpahayag nga hubog ini sang natabo ang insidente.
Base sa pahayag sang Iloilo City Police Office, nag-report ang tagreklamo nga si alyas Ramil nga isa man ka guard nga assigned man sa DPWH batok kay Espinosa.
Ginsiling sang tagreklamo nga sang amo nga tion, on-duty siya sa guard house kag si Espinosa ang magabulos sa iya duty.
Apang pahayag ni alyas Ramil, hubog si Espinosa nga ginhambalan niya ini nga magpangayo sang pahanugot sa ila chief security antes ini magduty nga ginkaakig naman ni Espinosa rason nga ginkuha niya ang iya service firearm kag gintaya sa iya kaupod.
Sang nag-abot na ang pulis, nakit-an pa nila si Espinosa nga bitbit ang iya shotgun rason nga gindakop ini.
Sa interview naman sang Bombo Radyo kay Espinosa, iya ginpahayag nga antes ang insidente, nakabati ini sang istorya halin sa iya kaupdanan nga gwardiya nga nagapakalain sa iya rason nga sang nag-abot siya sa lugar, ginsukmaan niya ang mga ini.
Gin-ako man niya nga hungod niya nga ginkasa ang armas-luthang apang hugot naman sini nga ginpanginwala nga hubog siya sang amo nga tion.
Nagapangatubang ini subong sang kaso nga Alarms and Scandal kag Grave Threat.
