ILOILO CITY – Lauman ang mas istriktu nga pagsulundan may kaangtanan sa pagsaulog sang Dinagyang Festival 2020.
Ini ang may kaangtanan sa pag-umpisa sang deployment sang tanan nga security force matapos ang send off ceremony kag blessing agud nga masiguro nga wala sang may matabo nga krimen kadungan sang nasambit nga kahiwatan.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga may yara sang frisking nga patiugayunon sa magasulod sa judging areas ilabi na sa ruta nga paga-agyan sang mga tribu.
Suno kay Sangrines, may yara sang duha ka mobile jail nga ipahamtang sa city proper area kag duha man sa Smallville area sa diin nahamtang ang mga ilimnan.
Ginpahayag ni Sangrines nga magluwas sa frisking, ginadumili-an ang pagdala sang hinganiban bangud nga humalin Enero 22 tubtub 27, epektibo ang gun ban sa bug-os nga syudad sang Iloilo.
Magluwas sa istrikto nga pagpatuman sang security measures, may yara man sang naga stand-by nga mga security personnel halin sa Police Regional Office 6, Iloilo City Police Office, Philippine Army kag iban pa nga law enforcement agencies lakip na ang force multiplier nga volunteer groups.
