ILOILO CITY – Ginakwestiyon sang pila ka mga pumuluyo sa syudad sang Iloilo ang sistema sang panggobyerno bangud sang asud-asud nga krimen sa syudad subong nga semana.
Kun matandaan, Marso 3 sang natabo ang ginapahayag abduction sa isa ka lalaki sa dalan Rizal, City Proper kag ginsundan sang buybust Operation nga ginpatigayon sang Regional Drug Enforcement Agency sa amo man nga lalaki sa Brgy. Sta. Filomena, Arevalo, Iloilo City.
Sang Marso 5, ginluthang-patay sang riding-in-tandem suspects ang isa ka ginapahayag asset sang National Bureau of Investigation sa Brgy. Democracia, Jaro, Iloilo City.
Kahapon, Marso 6, ginluthang-patay ang isa ka wala pa nakilala nga lalaki sa Brgy. Sooc, Arevalo, Iloilo City.
Ini nga mga kaso ang nagapabilin nga unsolved tubtob subong.
Sa interview sang Bombo Radyo kay Alyas Edward, isa ka pumuluyo sa syudad kag isa ka negosyante, iya ginpahayag nga indi na siya sigurado kun ano ang saligan.
Suno sa natungdan, talalupangdon man ang pagkadula sang salig sang mga pumuluyo sa otoridad.
Dugang pa ni Edward, indi na mapat-od ang seguridad sa subong kag indi man mapaktan kun pulis ukon indi ang magdakop sa mga tawo bisan nagalakat lang sa dalan.
Pahayag pa ni Edward, sa iya bahin, naga-aligmat gid siya sa iya palibot kag masami nga nagapauli diretso sa balay sa tion nga matapos na niya ang iya trabaho sa iya negosyo.
