Tuman ka apektado ang sektor sang negosyo sa syudad kag probinsya sang Iloilo kasunod sang pagtaas sang presyo sang kuryente.
Sa interview sang Bombo Radyo kay Lea Lara, executive director sang Iloilo Business Club, iya ginpahayag nga nagpadala na sila sang letter of appeal sa pamunuan sang Energy Regulatory Commission agud mahatagan sang igtalupangod kag solusyon ang nasambit nga isyu.
Nahibaluan nga ang rate increase sa kuryente ang may kaangtanan sa naguba nga high-voltage submarine cable sang National Grid Corporation of the Philippines (NGCP).
Naguba ang nasambit nga cable sang nasalapay ini sang naga-dredging kag re-channeling ang katapo sang Department of Public Works and Highways (DPWH) sa Bio-os River sa Barangay Jagna, Amlan, Negros Oriental.
Bangud sini, nabuhinan ang transmission capacity sang NGCP sa power distribution utilities sa Panay kag Negros Islands kag naapektuhan ang presyo sang kuryente sa merkado.
Halin sa P1.55 per kilowatt hour, nagsaka sa P7.99 per kilowatt hour ang rates sang kuryente humalin sang bulan sang Agusto, 2021.
Suno kay Lara, kuntani masolusyuan ini sang Energy Regulatory Commission agud mabuligan man ang mga Ilonggo ilabi na ang mga negosyante nga nagsarurot man ang kita bangud sa COVID-19 pandemic.
