Ginkawatan sang isa ka security guard ang pawnshop nga iya man ginabantayan sa Rodriguez, Rizal.
Suno kay Police Colonel Felipe Maraggun, provincial director sang Rizal Province Provincial Office, gingamit pa mismo sang suspek ang iya nga service firearm sang ginhimo sini ang krimen.
Ginapahayag nga yara sa P1.2-million ang nakuha sini nga kuwarta kag kagamitan antes nagpalagyo.
Suno kay Maraggun, na-profile nila ang guwardiya kag natukiban nga may utod ini nga pulis nga amo naman ang ginkontak sang otoridad agud nga mapasungka ang suspek.
Isa ka semana matapos ang nahimo sini nga krimen, nagsungka ini sa mga pulis paagi sa iya nga utod. Ginaproseso na subong agud nga ma-recover ang mga kinawatan sini.
Nahibaluan nga tatlo ka tuig na ini nga nagaserbe bilang security guard sa pawnshop antes sini nahimo ang pagpangawat.
Sampaw-sampaw nga kaso ang atubangon sang suspek lakip ang illegal possession of firearms.
