Gin-anunsyo sang Bangsamoro Grand Mufti nga bwas pa, Marso 21, ang obserbasyon sang mga Muslim sa Pilipinas sang Eid’l Fitr.
Suno ini kay Sheikh Abdulrauf Guialani matapos ang ginpatigayon nga moon sighting activities sa Bangsamoro Autonomous Region in Muslim Mindanao kag sa iban pa nga designated areas sa pungsod.
Importante nga makit-an ang moon crescent agud nga matumod kun san-o magasugod ang bag-o nga bulan para sa mga Muslim.
Buot silingon sini, magapuasa sang isa pa ka adlaw ang mga Pilipino nga Muslim agud nga makumpleto ang 30 ka adlaw nga Ramadan antes maselebrar ang Eid’l Fit’r buwas, Marso 21.
Sa pihak sini, magapabilin nga isa ka regular holiday ang Marso 20 ukon subong nga adlaw sandig sa nauna nga deklarasyon sang Malacañang.
Ang Eid’l Fitr amo ang una nga adlaw sang Shawwal nga amo ang ika-10 nga bulan sa Islamic Calendar nga ginatawag nga “Hijri.”
Ini ang nagamarka sang pagtapos sang isa ka bulan nga pagpuasa sang mga Muslim kadungan sang Ramadan.
Sa kada Eid’l Fitr, tradisyonal nga nagaselebrar ang mga Muslim sa tatlo ka adlaw nga naga-umpisa paagi sa pagpangamuyo sa mga mosque sa kaagahon, nagatipon ang mga pamilya kag mag-abyan, nagasaluhay, kag nagabayluhanay sang regalo.
