Magaatubang sa Kamara subong nga adlaw, Abril 14, si Ramil Madriaga nga amo ang self-confessed bagman ni Vice President Sara Duterte.
Siya ang maga-testify sa House justice committee kadungan sang clarificatory hearing agud matumod kun may “probable cause” sa impeachment proceedings batok sa bise presidente.
Naghatag ang judge sang Manila Regional Trial Court Branch 21 sang permiso nga mag-atubang si Madriaga sa panel kasunod sang request sang panel chair nga si Rep. Gerville Luistro.
Suno kay Bicol Saro party-list Rep. Terry Ridon, myembro sang amo nga committee, ginalauman nila nga magatambong subong nga adlaw ang mga personalidad nga ila gin-subpoena lakip na ang mga dokumento kag iban pa nga mga ebidensya.
Diskusyunan man ang kaundan kag mga detalye sang sworn affidavit ni Madriaga agud mahibaluan kun masaligan bala ini nga testigo.
Sang nagligad nga semana, nagpahayag si Ridon nga posible temprano pa ipaatubang sa hearing si Madriaga sunod sa court order nga nagahatag sang permiso para sa iya nga appearance.
Una na nga gin-claim ni Madriaga nga nangin aide siya ni Duterte kag nag-deliver sang mga bag sang kuwarta.
Ginbulgar man anay ni Madriaga nga ang May 2022 vice presidential campaign ni Duterte ang ginsuportahan sang drug lords kag Philippine offshore gaming operators nga ginapangunahan sang mga Chinese.
Gin-alegar man sini anay nga siya ang nag-handle sang delivery sang confidential funds nga naangot sa Office of the Vice President kag Department of Education kun sa diin nangin tiglikom man anay si Sara.
Kun basehan naman ang kampo ni Duterte, ginpahayag nila nga wala sila nalingkang bisan pa mag-atubang si Madriaga.
Ginsiling nila nga indi nila ini pagpunggan nga magkadto sa Kamara, apang nagpahayag man ang kampo nga basi suno sa ila patihan sang mga tawo ang amo nga testimoniya.#
