Nag-file sang certificate of candidacy (COC) bilang Mayor sang Albuera, Leyte ang self-confessed drug lord nga si Rolan “Kerwin” Espinosa.
Gin-updan si Espinosa sang iya mga kaangay nga kandidato sa idalom sang Bando Espinosa-Pundok Kausaban (BE-PK) party.
Matandaan nga si Espinosa ang nangin kontrobersyal matapos gin-angot ni former president Rodrigo Duterte sa illegal drug trade sa Eastern Visayas, sa diin nag-testify man ini sa Senate hearing sa narcotics operations sa pungsod.
Sang Hunyo, ginbasura sang Leyte Regional Trial Court (RTC) ang kaso batok kay Espinosa bangud sa kakulang sa ebidensya.
Gintumod man si Espinosa sadto bilang top drug personality sa Eastern Visayas.
Gin-angot man ini sadto sa paghatag sang drug money kay former Senator Leila de Lima pinaagi sa iya anay aide nga si Ronnie Dayan.
Apang sang 2022, ginbawi ni Espinosa ang iya mga akusasyon batok kay de Lima sa diin ginrason sini nga ginpwersa siya kag ginpahog agud itudlo si de Lima.
Na-clear naman si de Lima sa tanan sini nga kaso nga ginpato-pato sang Duterte administration.
