Ginbuyagyag ni Jeffrey Celiz nga kilala sa tawag nga “Ka Eric Almendras”, ang matuod nga ginhalinan sang listahan sang mga eskwelahan sa Pilipinas sa diin may nagakatabo nga recruitment sang Communist Party of the Philippines-New People’s Army-National Democratic Front (CPP-NPA-NDF).
Ang listahan ang ginpaggwa ni National Task Force to End Local Communist Armed Conflict (NTF-ELCAC) Spokesperson Lieutenant General Antonio Parlade Jr.
Sa Iloilo, lakip sa mga unibersidad nga gintumod ni Parlade nga may recruitment sang NPA amo ang University of the Philippines Visayas, West Visayas State University kag Central Philippine University.
Sa exclusive interview sang Bombo Radyo Iloilo kay Celiz, self-confessed whistleblower sang military batok sa Community Party of the Philippines-New People’s Army (CPP-NPA) kag Research Consultant sang NTF-ELCAC, iya ginpahayag nga nagapasalamat sila sa gobyerno nga nanindugan kag may yara sang kaisog nga ibuyagyag ang pangalan sang mga unibersidad nga ginabalayan sang kaaway sang gobyerno.
Gintuad ni Celiz nga ang lista sang mga ekwelahan nga ginpaggwa sang NTF-ELCAC ang wala gin-imbento kag naghalin sa intelligence recovered materials kaangay sang laptop, computer, external hard drive kag iban pa nga digital files sang mga central committee leaders sang CPP-NPA-NDF nga sanday Vicente Ladlad, Adelberto Silva, kag Esterlita Suaybaguio.
Suno kay Celiz, ini ang nag-agi sa forensic examination sa diin madamo sang narekober nga mga files.
Kulang pa suno kay Celiz ang listahan nga ginpaggwa sang NTF-ELCAC.
Yari ang mga eskwelahan nga wala nalakip sa listahan suno kay Celiz:
Iloilo Science and Technology University
University of San Agustin
PHINMA-University of Iloilo
Aklan State University
Northwestern Visayan Colleges
Negros Oriental State University
UP Miag-ao
Capiz State Univesity
University of Negros Occidental-Recoletos
Ginabanta indi magnubo sa 70-80 ka mga eskwelahan suno sa natungdan ang wala pa malakip sa listahan.
Nagpanawagan naman si Celiz sa pamunuan sang mga eskwelahan nga indi ang gobyerno ang dapat basulon diri kundi ang Communist Party of the Philippines-New People’s Army-National Democratic Front (CPP-NPA-NDF) nga nagapadayon sa pagpangrecruit, pagpangtunto, pagpatalang kag pangguba sang bwas damlag sang mga estudyante.
“Wake Up Call” na ini sa mga eskwelahan suno kay Celiz nga tagaan nila sang igtalupangod ang kamatuoran nga accountability kag responsibilidad nila ang ila mga estudyante nga nagkalamatay bangud sa pagpakigbahin sa CPP-NPA-NDF.
Gin-athag ni Celiz nga ang katuyuan sang ginpaggwa nga listahan indi amo ang pakahuy-an ang mga eskwelahan kundi mangin wake up call nga ubrahon ang ila katungdanan agud protektahan ang ila mga estudyante.
“If we continue to deny, if we continue to be defensive rather than being open minded..and being honest to admit that there is a situation of recruitment, radicalization, and there is a situation of continuing underground na pagbuo sang CPP-NPA-NDF gamit ang mga organisasyon nga nagapakuno-kuno nga ligal kag above ground kag kun indi ta ni pagbuligan ang gobyerno, tubtob san-o nga indi ni matapos ang vicious cycle sang communist insurgency nga nagawasak sang aton kabataan,” dugang pa niya.
Nagpanugyan man si Celiz sa mga unibersidad kag buluthuan nga mangin bukas sa pagkooperar sa gobyerno kag magbulig sa pagpabaskog sa mga matuod nga nagapugong agud nga indi na maglapta ang virus sang CPP-NPA-NDF.
