ILOILO CITY – Sa subong nga nagamahal na gid ang mga balaklon, madamo na sang nagahambal nga indi na lang magbata ukon indi na pagdugangan ang bata.
Apang sa Pakistan, isa ka 52 anyos nga doctor ang sang damlag lang, nag-welcome sang iya ika-60 nga anak.
Kag indi lang ina. Gusto pa nita nga dugangan ini.
Si Sardar Jan Mohammad Khan Khilji ang may kaugalingon nga clinic sa ila lugar kag may tatlo na ka asawa.
Sang nabun-ag ang iya ika-60 nga anak, ginpahayag ni Sardar nga gusto pa niya nga magpangasawa liwat agud nga madugangan pa ang iya mga anak.
Ang goal gali ni Sardar amo nga maka-angkon sang 100 ka mga anak.
Ang self-proclaimed “doctor” nga nagapadalagan sang unregulated clinic kun sa diin, ginabulong sini ang mga minor ailments kaangay sang sakit sang ulo ang sang una, nagapadayaw gid sang iya manggad kag masarangan niya nga magsagud sang iya bilog nga pamilya.
Apang sining ulihi lang, gin-ako niya nga apektado man siya sang inflation apang committed sa gihapon nga magpadako pa sang iya pamilya.
Kung madumduman ninyo, gindala man naton diri ang istorya sang isa ka mangunguma sa Ghana nga may 102 ka mga kabataan kag 568 ka mga apo.
Ini ang mahimo pa nga malagas ni Sardar bangud nga mas bata ini kun ipa-anggid sa taga-Ghana.
